TVB早前正式入駐微信視頻號,日前更舉行《香港群星新春互動直播演唱會》,一眾參與的歌星藝人分別喺香港、上海兩地獻唱,吸引了3,463萬人觀看,刷新咗該平台直播紀錄,亦超過1,967萬個讚好,反應熱烈。
同場加映: 聲夢傳奇丨After Class四小花畫老虎應節 炎明熹難忘鄉下放炮仗 姚焯菲最愛食
TVB總經理(節目內容營運)曾志偉及汪明荃、李克勤、張智霖、葉蒨文、楊千嬅、杜麗莎、草蜢、任賢齊、肥媽、王祖藍、李亞男、黎耀祥、陳豪、陳展鵬、單文柔、馬德鐘、蕭正楠、黃宗澤、吳卓羲、馬國明、羅子溢、胡定欣、胡鴻鈞、《聲夢傳奇》學員等輪流獻唱演出,陳展鵬同單文柔以及袁偉豪同張寶兒兩對夫妻齊齊出鏡曬幸福;王祖藍更出動一家四口表演,大女表情多多非常鬼馬,遺傳到父母嘅表演欲同爸爸嘅搞笑基因。
其實祖藍都已經唔係第一次「私器公用」,2014年嘅《萬千星輝賀台慶》祖藍同李亞男情侶檔玩魔術,其次就係直播同李亞男求婚。時任無綫行政主席梁乃鵬更感動到抹眼淚,表示高興亦唔覺得台慶風頭被搶。而事實祖藍求婚亦係當晚嘅高潮,但就有唔少網民覺得佢哋「做騷」。
另外,張智霖(Chilam)同陳小春、謝天華、林曉峰、梁漢文等早前拍攝內地綜藝節目《大灣仔的夜》,企圖喺廣州直接坐船回港;雖然最後並不成功,但Chilam等人就版質疑係咪想「偷渡」。Chilam特別回應「偷渡」一事︰「船家有話我哋知呢條水路路綫可以去香港,但仲有幾個鐘路程先到香港水域,同埋大家都知道絕對唔能夠上岸。(節目組此舉欠缺常識?)呢個唔清楚,一切係節目組安排嘅。」
Chilam解釋自己於本月25日已經回港,更特意到尖沙咀欣賞維港靚景,又相約友人打麻雀敘舊,他笑言︰「啲朋友就最開心,因為我狂輸,做咗財神畀佢哋發新年財,我要同啲麻雀做番朋友。」
撰文:黃蘊姿